ما هو فيروس زيكا؟

في الفترة الأخيرة خرج الإعلام علينا بكارثة  تهدد الإنسان وهي فيروس جديد اسمه فيروس زيكا و منظمة الصحة العالمية أعلنت بالفعل أن الفيروس الجديد ده خطر جديد مينفعش أبدا نستهين بيه لانه خطره الحقيقي على الأجيال اللي جاية.

العدوى بالفيروس الغريب ده مرتبطة بنمو الأطفال حديثي الولادة بشكل غريب جدا عن الطبيعي خصوصا شكل الرأس وطبعا لأن حجم الرأس بيكون صغير اكيد طبعا المخ كمان أصغر بكتير عن العادي وده تأثيره خطير على النمو العقلي للطفل

السؤال اللي أكيد محيرانا هو ايه فيروس زيكا بالضبط؟

فيروس زيكا هو عدوى فيروسية بتتنقل عن طريق الناموس وهي عدوى لها علاقة أصلا بحمى الضنك والحمى الصفراء وفيروس تاني اسمه فيروس غرب النيل.

وعلى فكرة  فيروس زيكا مش عدوى جديدة زي ماحنا متخيلين بالعكس ده موجود من زمان جدا من أكتر من نصف قرن ومنتشر في أفريقيا وآسيا من زمان فى المناطق الاستوائية اللي فيها بعوض وناموس

اكتشف  الفيروس لأول مرة عام 1947 في غابة زيكا باوغندا ومن هنا جت تسميته بفيروس زيكا

والضجة الإعلامية المثارة عليه دلوقتي بسبب انتشاره بشكل ملحوظ من شهر مايو اللي فات في البرازيل

والعدوى مش بتسيب أي اعراض ملحوظة ولكن الخطر الحقيقي بيكون على الحوامل لأن الفيروس بيتنقل من الام الحامل للجنين عن طريق المشيمة  وده بيتسبب في تلف في مخ الجنين ويتولد الطفل باعاقات كتيرة بسبب حجم مخه اللي بيكون أقل بشكل ملحوظ من الحجم الطبيعي لسنه

والسبب الرئيسي لانتشار عدوى فيروس زيكا الناموس بس مش معنى كدة أن كل أنواع الناموس تقدر تنقل العدوى

وفي حالات اكتشفت لانتقال العدوى عن طريق الاتصال الجنسي

الخطر الحقيقي في فيروس زيكا هو أنه عدوى صامتة ملهاش اعراض واضحة وحتى لو ظهرت اعراض بتكون ارتفاع في درجة الحرارة و الالام بالمفاصل واحمرار بالعين و طفح جلدي يعنى من السهل الخلط بينها وبين اعراض أمراض بسيطة تانية

ودي اعراض حتى  لو ظهرت بتظهر بنسبة صغيرة جدا يعنى على واحد من كل خمس مصابين

الاسوء من صعوبة التشخيص أنه من الأربعينيات وقت اكتشاف الفيروس لأول مرة ولحد دلوقتي محدش اكتشف له علاج وملوش مصل واقي حتى منه

وده السبب الرئيسي للمخاوف من الفيروس بالذات لان انتشاره يعني جيل من الأطفال ذوي الإعاقة خاصة مع سرعة انتشاره في الشهور الأخيرة وانتقاله لدول كتير وصلوا لحد دلوقتي ل24 دولة أبرزها البرازيل السلفادور وبولينيزيا الفرنسية

Loading...